UKA 2001/18
Nassuiaatit nalinginnaasut.
Atuisartunut Siunnersuisoqatigiit kajumissaaruteqareernerisigut atuisartut sinniisaasa sulineranni nunaqarfinni aqutsisut ilanngutitinneqarnissaannut periarfissaqalernissaa kissaatigineqarpoq. Taamaaliortoqarpoq ilaatigut sumiiffinni pissutsinik ilisimasaqarnerulernissaq ilaatigullu sulinerup pitsaanerulersinneqarnissaa pillugit. Allannguinerup peqatigisaanik nunaqarfinni aqutsisut suliassanik Atuisartunut Siunnersuisoqatigiinnut suliassanngortitsisinnaalissapput. Suliassanilli suliassanngortitsineq oqartussaassuseqarnerup akerleriissutigineqarsinnaanera pinngitsoorniarlugu kommunini atuisartut sinniisaat aqqutigalugit pisassaaq.
Kiisalu akikillisaanermik aaqqissuussineq Kalaallit Nunaanni atortinneqalersimasoq nassataqarsimavoq naammagittaalliuutinik, tassa aningaasat amerlassusii aalajangersimasut aatsaat sinnerlugit pisisoqarnerani akikillisaasoqarsinnaammat aammalu meqqit akikillisaatit nalingat aatsaat tunniunneqarsinnaammat aningaasarpaalunnik nalilinnik pisereersimanermut meeqqit malillugit. Paasisat tamakku tunngavigalugit Atuisartunut Siunnersuisoqatigiit kissaatigisimavaat akikillisaatitut meqqit tunniunneqartarnerisa taakkulu nalingisa tunniunneqarnissaannut maleruagassiortoqassasoq Danmarkimi maannakkut maleruagassanut assingusunik.
Inatsit isummerfigeqqusissutigineqarpoq Atuisartunut Siunnersuisoqatigiinnut, Kalaallit Nunaanni Kommuneqarfiit Kattuffiannut KANUKOKA-mut, Sulisitsisut Peqatigiiffiannut, Kalaallit Nunaanni niuernermi, sullissinermi assartuinermilu sulisitsisut kattuffiannut HST-mut, KNI Pisiffik A/S-imut, KNI Pilersuisoq A/S-imut, KNB-mut, Aningaasaqarnermut Pisortaqarfimmut aammalu Nunami namminermi pissutsinut allaffimmut. Isummerfigeqqusissut sukumiinerusumik oqaaseqaateqarfigineqarsimanngilaq.
Aningaasatigut allaffissornikkullu kingunerisassat:
Inatsisissatut siunnersuutip aningaasatigut allaffissornikkullu kingunerisinnaasaanni aalajangiisuussaaq inatsisissatut siunnersuutip naammassineqarneratigut Atuisartunut Siunnersuisoqatigiit suliassaqarnerulissanersut tamatumalu kingunerisaanik allattoqarfeqarnikkut aningaasartuuteqarnerulertoqassanersoq. Pisortaqarfiup taamaattoqalersinnaanera nalileruminaatsippaa.
Atuisartut pisisartullu sullinneqarneranni nunaqarfinni aqutsisut peqataatinneqalernissaasigut siunertaavoq taamatut sulinerup najukkani annertunerulersinneqarnissaa.
Allannguutissatut siunnersuummi aalajangersakkanut ataasiakkaanut nassuiaatit.
§ 1-imut
Nr. 1-imut
Nunaqarfinni suliassat nunaqarfinni aqutsisut suleqatigalugit kommunikkuutaartumik atuisartut sinniisaannit naammassineqartartussanngortinneqarput. Taamaaliornikkut najukkani atuisartut sullinneqarnerat nukittorsarniarneqarpoq.
Nr. 2-mut
Inatsit naapertorlugu suliassat naammasseqquneqartut Atuisartunut Siunnersuisoqatigiinnit naammassineqarsinnaassappata Atuisartunut Siunnersuisoqatigiit pisariaqarsorinninnertik naapertorlugu nunaqarfinni aqutsisunut Atuisartunut Siunnersuisoqatigiit toqqaannartumik peqqusisinnaasariaqarput paasissutissat Atuisartunut Siunnersuisoqatigiit sulinerminni pisariaqartitaasa pissarsiarineqarnissaannut. Naatsorsuutigineqarpoq tamatuma kingunerissagaa Atuisartunut Siunnersuisoqatigiit pitsaanerusumik sulilernissaat.
Nr. 3-mut
Nunaqarfinni aqutsisut tunngavissinneqarput suliassanik Atuisartunut Siunnersuisoqatigiinnut suliassanngortitsinissaminnut, kommunikkuutaartumik atuisartut sinniisaat aqqutigalugit.
Nr. 4-imut
Imm. 1-imi aalajangersakkakkut aviisini ullormut saqqummersartuni, aviisini neqerooruteqarfinni aamma quppersakkani piseqqusaarutini il.il. qiortakkat nalillit inerteqqutigineqarput. Aalajangersakkakkut mattunneqanngilaq peqatigiiffimmi ilaasortaaneq, suliffimmi aalajangersimasumi sulisutut atorfeqarneq il.il. tunngavigalugit aaqqissuussaasumik akikillisaasoqarsinnaanera. Akikillisaanerilli taamaattut tunniunneqarpata aalajangersagaq eqquutsinneqassaaq, taamaammat ilaasortanut atuagassiatigut il.il. qiortakkat atorlugit akikillissaatit tunniunneqassanngillat.
Imm. 2-mi aalajangersakkap taamaallaat kingunerissavaa meqqit kingusinnerusukkut nalingat tunniunneqarsinnaasoq atorlugit akikillisaasoqarsinnaanera, tamannalu pissaaq aalajangersakkami erseqqinnerusumik taaneqartut malillugit. Aalajangersagaq meqqinut nalilerujussuunngitsunut aamma atuuppoq. Agguagarsiat ingerlatsinermi angusat malillugit tunniunneqartut pineqartunut ilaanngillat tunniussisoqarnissaa pinngitsoorani pissasoq neriorsuutaanngimmat. Qanganitsertoqarneranut maleruagassiat nalinginnaasunut tunngatillugu nalingisa tunniunneqarnissaannut sivikinnerusumik pifissaliineq § 9-mi maleruagassamut akerliusinnaavoq, soorluttaaq nalingata tunniunneqarnissaanut immikkut pissutissaatitaasussat allat.
Nr. 5-imut
Allannguinerup kingunerissavaa § 10a, imm. 1 aamma 2-mik unioqqutitsinerup akiliisitaassutissamik aamma pineqaatissiissutaasinnaanera.
§ 2-mut
Inatsit atortuulerpoq ulloq 1. december 2001.
§ 3-mut
Ikaarsaariarnermi aaqqissuussinertigut qularnaarneqarpoq aaqqissuussinerit ingerlareersut torersumik ingerlanneqarnissaat aammalu akikillisaanerit katersoriikkat katersorneqarnerannut pissutissaatitaasut malillugit nalingat tunniunneqarsinnaasunngorlugu. Piffissaliussakkut inuussutissarsiummik ingerlataqartut akikillisaanermik aaqqissuussinermik ingerlatarisimasinnaasamik allanngortinnissaanut periarfissinneqarput, taamaalillutillu kingusinnerpaamik 1. juli 2002-mi inatsimmi aalajangersakkat naapertorlugit ingerlatsilersinnaallutik.